AREKETKE AZIR OLUÑIZ. "JOVTA STRİÇKA" AREKETİNİÑ TEVSİYELERİ

Cemaat yerlerinde yüzüñizni açıp vazifelerge çıqmañız – maskalanuv içün qorçalayıcı tibbiy maskalar kiyiñiz! Evden çıqmazdan EVEL maska ​​kiyiñiz ve evge qaytmağance onı çıqarmañız, yoldaki iç bir kamerağa yüzüñiz körünmesin. Maskanı (bir kerelik, logotiplersiz) yüzüñizni mümkün olğanı qadar qapatacaq şekilde kiyiñiz. Esas maskağa bir şey olsa, yanıñızğa yedek maska olsun. Bularnıñ episi siziñ şeeriñizde maska ​​rejimi olğanda çalışır.

Mahsus maskalarnı, meselâ, karnaval maskalarını ya da mahsus yuz qapatıcı maskalarnı qullanmañız. Adiy qorçalav ve tibbiy maskalar, közlükler, şal yasaq degil.

Bundan ğayrı, kapüşon ve/ya da közge körünmegen şapke kiymege mümkün. Közge çarpqan urba, belli işaretleri/resimleri olğan ya da er vaqıt siziñ kiygen urbalarnı kiymeñiz. Tatuirovkalarnı, saç şekliñizni ve saç renkiñizni urbanen saqlañız. Bir qaç qat urba kiyiñiz.

Bu narazılıq ve mitingler keçirilgende de yardım ete.

Evden çıqqanda ve evge qaytqanda aynı yolnı qullanmañız. «Eviñiz – vazife yeri – eviñiz» yolu telükelidir, sizni qolaylıqnen taqip etmege mümkün olur. Marşrutıñıznı evelden tüşünip baqıñız ve oña eñ olmağanda bir qaç «kör yer» kirsetiñiz – közetüv kameraları olmağan kiçik soqaqlar, azbarlar ve parklar (olar pek çoq degil). Tek büyük soqaqlardan keçken marşrutlardan qaçınıñız – olarda çoq vaqıt kör yerler olmay. Eger yolıñızda militsiya bölükleri ya da işğalcilerniñ başqa uquq qorçalav organları, ya da rus askerleri olsa – muqayt oluñız! Bu yerlerden uzaq olsañız yahşı olur.

Cayav ya da yer üstü naqliyatınen yürmege tırışıñız. Eñ yahşı naqliyat – bu mikroavtobuslar, avtobuslar, tramvaylar. Şahsiy seyaat kartalarını degil de, bir kerelik biletlerni qullanıñız. Aqtarma olğan marşrutnı seçip alıñız, eviñizge qadar aynı arabanen ketmeñiz.

Taksi ve araba kira hızmetlerinden faydalanmañız (programma ve telefon nomerinden kim olğanıñıznı qolay belgilemek mümkün). Eger taksi qullanmaq kerek olsa – öz telefonıñızdan ve doğrudan eviñizge araba çağırmañız: taksige miniñiz ve eviñizden ya da narazılıq yerinden bir-eki kvartal uzaqlıqta çıqıñız.

Öz maşinañıznı qullanmañız. Siziñ araba nomerini kameralar yardımınen izlemek ve kim olğanıñıznı belgilemek mümkün.

Aktsiyadan evel, vaqtında ve soñra iç bir yerde, ne tükânlarda, ne de naqliyatta bank kartalarınen para tölemeñiz. Er angi tölev - naqit para ile yapılmalı.

Eñ yahşısı, eger tutuluv ihtimali olsa, yanıñızğa yedek «temiz» telefon taşımaq, esas telefonıñıznı ise evde qaldırıñız. «Temiz» telefon – bu siziñ içtimaiy ağlarıñızğa ve yazışmalarıñızğa irişimi olmağan, içinde iç bir türlü şahsiy fotoresim ve malümat olmağan, sim-karta pasportıñızğa bağlı olmağan telefondır (meselâ, bu turistik sim-kartası ola bile).

Eger sizde yedek telefon ve «temiz» sim-karta olmasa, evden çıqmazdan evel, telefonıñızda telükesizlik parametrleri çalışqanından emin oluñız. Kelgen bildirüvler kilitlengen ekranda körünmemesi içün telefonnıñ parametrlerini deñiştiriñiz. Tutuluv vaqıtta sizge ya da dostlarıñızğa zarar ketire bilecek malümatnı, vesiqalarnı ve programmalarnı telefonıñızdan evelden köçürip yoq etiñiz. Ayrıca messencerlerniñ mündericesine diqqat etiñiz. Kimerde çatnı temizlemek qolayca, kimerde ise messencerni vaqtınca silmek.

Telefonnı ve yüklendirgiç aletini toldurmağa unutmañız, yanıñızğa yüklendirgiç ve kelişken kabel alıñız.

Tutuluvlardan ğayrı, Z-provokatorlarğa ya da sadece agressiv olğan adamlarğa rastkelme ihtimali de bar. Onıñ içün yalıñız çıqmamağa tırışıñız. Çatışmalarğa qarışmañız, eger sizni tecavuzğa qozğasalar ya da sizge qarşı tecavuz köstermege tırışsalar, yeriñizni deñiştiriñiz.