VAQTINCA İŞĞAL ETİLGEN TOPRAQLARDA KERÇEK OLMAĞAN SAYLAVLAR VE REFERENDUM: IŞĞALCİLERGE YARDIM ETMEMEK İÇÜN NELER YAPILMALI QAÇIRILUV VE ESİRLİK

Rusiye işğal etilgen ukrayin topraqlarında sistematik şekilde sözde “referendumlar” ve “saylavlar” keçire. Bu demokratik esnaslarğa iç bir şekilde uymay ve halqara uquqnı qaba şekilde boza. İşğalcilerniñ maqsadı – işğalci akimiyetniñ “qanuniyetligi” aqqında illüziyalar yaratıp, dünyağa ukrayin topraqlarınıñ RF terkibine sözde ihtiyariy integratsiyasını köstermektir.

İşğal altında yaşağan sakinler içün eñ telükesiz ve eñ effektiv adım – bu tedbirlerni körmemezlikke urmaq.

Ne içün iştiraknıñ iç bir manası yoq

1. Bu serbest ve reqabetli esnaslar degil Kerçek saylavlar ya da referendumlar yoq. Bütün namzetler, meseleler, neticeler Kreml tarafından çıqarıla. “Saylavlar” içün sözde “munitsipal filtrler” ve başqa eleme mehanizmleri qullanıla ve böyle etip tek kerekli tek kerekli insanlar saylanması içün temel şekillendire.

2. İşğalciler içün eñ müim köstergiç – saylavğa kelgenlerniñ sayısı Aqiqiy yardım olarnı meraqlandırmay. Olarğa esabatlardaki raqamlar kerek. Şunıñ içün olar “rey berüvni” bir qaç künge sozıp, köçme rey sandıqları, yaşağan yerlerini yoqlav ve onlayn rey berüv kibi usullarnı qullanalar.

3. Şahsiy malümatnı yazıp aluv – basqı aletleridir Saylav bölüklerinde ve yoqlavlar vaqtında telefon nomeralarını, adres, iş ya da oquv yeri bilgilerini sıq-sıq yazıp alalar. Bu tek aqlarnıñ bozulması degil de, ileride nezaret ve repressiyalarnıñ bir yoludır, hususan bücet saasına bağlı olğanlar içün. Bülletenni bozsañız da ya da “er keske qarşı” rey berseñiz de – siziñ kelgeniñiz statistikada qayd etilecektir. Bülletenler deñiştirile bile, amma siziñ şahsiy malümatlarıñız qalır.

4. İştirak etüviñiz sizge qarşı qullanıla bile İşğalcilerniñ mantığı sade: eger de siz kelgen olsañız, demek bir şeyni deñiştirme isteysiñiz – belki de, “er keske qarşı” ya da bir muhalifetçi içün rey beresiñiz. Bu siziñ "işançsız" olğanıñıznı köstere. Kelecekte böyle insanlar sorğulardan işten çıqaruvğa qadar “profilaktika” tedbirleri altında basqılarğa oğratıla bileler.

5. Bu er vaqıt propagandanıñ aleti ola, irade bildirüvi degil. Narazılıq olaraq rey berüvniñ iç bir şekli (bülletenni bozuv, "er keske qarşı" rey berüv ve ilâhre) manasızdır. Neticeler çoqtan belgilengendir ve siziñ bozğan bülleteniñizge kimse baqmaycaq. Propagandanıñ tesirini azaltqan tek kerçek şey – körmemezlikke urmaq.

Feyk referendumlarda ya da saylavlarda iştirak etmemek içün eñ yahşı strategiya – vaqtınca işğal etilgen topraqlardan çıqıp ketmek. İştirak etmekten qaçınmaqnı diqqatlı, özüñizni zorbalıq telükesine oğratmadan ve ruslarnıñ "qara cedvellerine" kirmeden yapmaq kerek.

Vaqtınca işğal etilgen topraqlarda feyk saylavlarnı havfsız şekilde nasıl körmemezlikke urmalı

• Saylav bölüklerine barmañız.
• Saylav künleri insanlar toplaşqan yerlerde (satış meydanları, vokzallar, eglence yerleri) olmañız, çünki anda “rey toplamağa” tırışacaqlar.
• Evde yoqlav komissiyasına rastkelme imkânını azaltıñız: bulunğan yeriñizni deñiştiriñiz, özüñizni qapatıñız ve anda olğanıñıznı iç bir belli etmeñiz.
• Açıq davağa kirişmeñiz. Eger zorlavdan qaçınmaq qıyın olsa, böyle bir tarafsız manaçıq uydurmaq mümkün: “men endi rey berdim”, “qorqam”, “diniy inançlarım bunı yasaq ete”.
• İşğalcilerge sahte referendum ya da sahte saylavlarnıñ teşkil etilmesinde yardım etmeñiz: komissiyalarda çalışmaqnı qabul etmeñiz, iştirak etüv içün teşviqat yapmañız, esnasnıñ teşkil etilmesinde maddiy ve logistik yardım köstermeñiz. Böyle areketler ciddiy bir uquq bozuluvı sayıla ve cinaiy mesüliyetke çekile (15 yılğa qadar azatlıqtan marum etüv).

Hatırlamaq kerek

• İşğal etilgen topraqlarda yaşağan sakinlerini "saylavlarda" iştirak etmege mecbur etmek, 1907 senesi qabul etilgen Gaaga şartnamesiniñ 45-nci maddesine köre, yasaqtır.
• "Rey berüv” faktı cinayet degil, lâkin sahte ceryanlarnıñ teşkil etilmesine yardım etüv – cinayet.
• Sahte saylavlar ve sahte referendumlarnı körmemezlikke urmaq – kerçekten de doğru ve telükesiz bir strategiyadır.
• Can ya da sağlıq içün kerçek telüke olğanda, er şeyden evel öz telükesizligiñiz aqqında tüşüniñiz.

Vaziyetiñizni eñ yahşı siz añlaysıñız ve siz içün eñ telükesiz olğan şeyni siz bilesiñiz. Hatırlañız, sahte saylavlarda iştirak etmemek doğru qarardır. Lâkin buña qarşı çıqmaqta siz içün bir telüke olsa eger, ilk evelâ telükesizlik aqqında tüşünmek kereksiñiz.

Ukrayina işğalden qurtaruv siyasetini ardı-sıra ömürge keçire, Ukrayina silalı quvetleri ukrayin topraqlarını azat ete. İşğalcilerniñ akimiyeti muvaqqattır.